ចង់ដឹងទេថាមនុស្សជោគជ័យក្នុងជីវិតគេធ្វើអ្វីខ្លះក្នុងថ្ងៃឈប់សំរាក?

មនុស្សដែលសំរេចជោគជ័យក្នុងការងារប្រើប្រាស់ពេលវេលានៅថ្ងៃឈប់សំរាកផ្សេងៗខុសពីថ្ងៃធ្វើការយ៉ាងដូចម្តេច? ថ្ងៃនេះយើងខ្ញុំសូមលើកយកអត្ថបទរបស់ទស្សនាវដ្តីល្បីល្បាញមួយឈ្មោះ Forbes​ ដែលបានឆ្លើយតបទៅនឹងសំនួរនេះមកផ្ញើប្រិយមិត្តបានដឹងថាតើពួកគេប្រើវិធីជិវិតដូច ឬខុសប្លែកពីអ្នកដ៏ទៃដែរឬទេ។

1-ពួកគេភ្ញាក់ពីគេងនៅពេលដូចវេលាធម្មតា

ទោះបីជាថ្ងៃឈប់សំរាកក៏ដោយ ការក្រោកពីដំណេកយឺតនឹងជះឥទ្ធិពលដល់នាឡិកាជីវិតបាន ហេតុនេះហើយមនុស្សជោគជ័យតែងតែភ្ញាក់ពីដំណេកយ៉ាងទៀងទាត់មិនខុសពីថ្ងៃធ្វើការធម្មតា។

2-ចាត់ចែងពេលវេលាពេលព្រឹកជាពេលវេលាផ្ទាល់ខ្លួន

សំរាប់អ្នកដែលមានគ្រួសារហើយ តែងតែមិនសូវមានពេលវេលាសំរាប់ខ្លួនឯងច្រើនទេសូម្បីតែថ្ងៃឈប់សំរាក ហេតុនេះពេលព្រឹកព្រហាមគឺពេលវេលាមាសដែលពួកគេអាចផ្តល់អោយខ្លួនឯងបាន។ ចាប់ពី 2 ទៅ 4 ម៉ោងក្រោយពីក្រោកពីគេងគឺជាពេលវេលាដែលខួរក្បាលស្រឡះជាទីបំផុត។

3-រកការងារស្រួលៗ សប្បាយៗនៅក្រៅផ្ទះធ្វើ

ជំនួសអោយការនៅតែក្នុងផ្ទះ ពួកគេតែងតែចាត់តារាងពេលវេលានៃការដំណើរការសកម្មភាពក្រៅផ្ទះបែបការផ្សងព្រេង ឬមិនដែលធ្វើពីមុនមកដែលនឹងធ្វើអោយថ្ងៃឈប់សំរាកមានលក្ខណៈពិសេសឡើង ចាត់ទុកជាការសាកថ្មថាមពលឡើងវិញអោយដល់រាងកាយ និង ចិត្តដើម្បីត្រៀមសំរាប់ការងារនៃសប្តាហ៍បន្ទាប់។

4-ដេញតាមសុបិនរបស់ខ្លួន

ការដេញតាមសុបិនរបស់ខ្លួន ឬធ្វើអ្វីដែលខ្លួនចង់ធ្វើនៅថ្ងៃឈប់សំរាកចុងសប្តាហ៍ ដូចជាការគូរគំនូរ លេងតន្ត្រី ឬប្រើប្រាស់ពេលវេលាជាមួយក្មេងៗ​ ត្រូវបានគេចាត់ទុកថាជាវិធីដ៏ល្អដើម្បីរំសាយការធុញថប់អារម្មណ៏ដែលសន្សំទុកពេញមួយសប្តាហ៍ដើម្បីត្រៀមខ្លួនជាថ្មីសំរាប់ថ្ងៃថ្មី។

ប្រភព : www.forbes.com